藝人秦沛接受傳媒專訪。問到Paul哥（秦沛）後生嗰陣係咪好多女人？他說：「女人，我都同人講，拍拖嗰啲，拖手仔個心已經跳到呢度（指著胸口位置），真係㗎，好多個到依家都好好朋友，如果有其他啲嘢呢，唔可能到今時今日都咁好朋友，真係，能夠錫到面珠仔已經不得了。」
但小寶(弟弟爾冬陞) 爆你好多女朋友喎？Paul哥淡定接招：「唔係男朋友就女朋友啦！同依家唔一樣，真係好純，跳舞隔開三呎，冇話攬住，嗰啲係修哥胡楓年代，去舞廳，我一次都冇去，我係『A GO GO』年代。」
三兄弟都係演藝界不可多得嘅人才
咁幾多歲初戀？Paul哥笑言：「好晏，19歲，唔係呢行，好多年之後先見番，大家好客氣。所謂初戀，瞓覺瞓唔着掛住佢。嗰時唔興講電話，都係寫信，寫到佢走咗去關島，無疾而終。」至於翁倩玉曾說Paul哥是她的初戀情人，對此Paul哥說：「有人講過，佢自己都承認，翁倩玉初戀男友係秦沛，佢依家係我仔女嘅契媽，拖手仔拍拖之嘛，好開心，跟住佢去咗日本，書信來往。」
Paul哥接受傳媒訪問 （圖片：蘋果日報）
Paul哥曾離婚，與梁盛子一段婚姻，誕下姜文杰姜麗文兩兄妹。後來兩人離異，有傳Paul哥將大部份資產都送給前妻，條件是要一對仔女的撫養權。所以，曾經有一段時間，Paul哥頗有經濟壓力。
姜文杰姜麗文兩兄妹
一個大男人，拖著兩個小朋友，當時的Paul哥出名是「帶子洪郎」。現任妻子森下繪梨的出現，改寫了Paul哥一生。Paul哥說，影響他最深的女人，也是她 。
「我依家個老婆。係啦，將我兩個仔女教到大學畢業，佢照顧得好好，我先可以安心喺香港一個人。佢好叻，處理我啲臭脾氣，話我聽應該點處理。佢細我七歲，但成熟過我好多，教我投資。唔單止對我，對我仔女都係，我仔女聽佢錫佢多過我，我阿媽、所有親友個個知。」問Paul哥有甚麼話想向太太說？「叫佢健康囉，睇住我呀！」
Paul哥同一對仔女感情好深厚，就算長大後都經常痴住老豆！
Paul哥續說：「佢身體OK嘅，依家喺加拿大。呢幾年我喺邊佢喺邊，陪住我。」說到此不無感謂：「佢辛苦啲囉。以前我做『太空人』，飛來飛去，依家佢好enjoy飛嚟飛去，因為喺大陸拍戲，呢十幾年去過唔同地方，佢陪住我到處睇。」原來Paul嫂厲害如人肉GPS：「佢好叻嘅，真係叻得好犀利。以前我好擔心佢，佢話得㗎，攞巴士地圖、地鐵地圖，自己到處行，佢又好行得，行幾粒鐘都得，咁咪放心囉。坐巴士去杭州西湖，影埋相；去上海又好犀利，坐9號線去到徐家匯，佢全部都知。」
「佢斗零都放棄晒，嫁畀個窮小子，我嗰時冇乜錢。我都好慘㗎，訂婚戒指都唔夠錢買，要問佢借，不過我還番畀佢。都好多錢㗎，問佢借咗十幾萬，幾大粒㗎嘛，所以咪還囉，拍一部戲咪還啲，還晒㗎喇。
（圖片：蘋果日報）
「唔係窮，冇乜錢囉，總之我畀唔到佢屋企畀佢個啲，『你考慮清楚，不過，我會盡我力量，總之有飯食飯，有粥食粥，我會努力嘅。』」咁當年究竟點追到千金小姐？他笑：「鍾意我有乜辦法？真係，緣份囉，所以男男女女我都係講嗰樣，唔好強求，分開咗唔好難過，可能係你運氣呢！如果結咗婚，生幾件，出現問題，怨都冇得怨。所以唔緊要，係佢就係，唔係佢點都唔係佢，take it easy。」
(apple daily)
