三子之母嘅梁洛施（Isabella），早已表示準備好復出娛樂圈，早前Angelababy經理人阿Kim就喺ig宣佈會同Isabella合作，其中一項計劃係拍戲。
而今日亦都係Isabella30歲牛一，大日子咁開心當然有影相留念，佢仲開咗新Instagram帳戶貼相，第一張就係生日會嘅相，同呢個帳戶一齊慶祝生日，相中除有壽星女Isabella外，仲有八男女，但佢哋全部用咗貼圖遮樣，當中三個係男孩，估計係Isabella同舊愛李澤楷生嘅李長治、同孖仔李長亨同李長軒。
Isabella又留言：「今早晨，我有新IG啦！今日係我同我家姐嘅大日子，我要同佢食食食同飲飲飲！」壽星女Isabella嘅蛋糕寫上「豬西妹妹」，喺佢右邊嘅家姐前面，就放有一個37歲生日蛋糕，佢個蛋糕就寫上「豬西姐姐」，兩個壽星女好玩得，直認「豬西」。
而同Isabella合作嘅Kim都好識做，喺相片留言Happy birthday。
(蘋果日報)
