名模Jessica C.（JC）星期二（19日）順產生仔巨B，現在已經回家休養。鬼妹仔性格嘅JC，調理身體有自己一套，百無禁忌，完全唔理中國人傳統習俗。有指大肚婆生完最怕受風，JC出院時着住飄逸連身裙，低胸露腿完全唔怕畀風吹。
返到屋企仲第一時間食生冷嘢。其經理人解釋：「JC鬼妹仔性格，生完仔之後立即飲咗一杯冰，返到屋企又口痕食雪糕。」而希望BB更健康成長的JC，選擇餵人奶，還不介意在親友面前餵人奶，思想十分開放。
偉大強勁的媽媽
囝囝Elvis係JC為老公安志杰誕下的第二個愛情結晶品，JC今次透露成個生產過程非常順利，BB仔仲係超級巨B，令全家都非常興奮！而安志杰媽咪同細妹亦特登喺外國飛返嚟睇BB出世。
今日安志杰細妹就喺社交網上載去咗醫院探JC合照，並以英文留言：「Hello to our precious lil boy Elvis!!!! My sis-in-law @jesscambensy is a Wonder Woman!!!（你好Elvis BB，我嘅嫂嫂JC係一位好偉大同強勁嘅媽媽）」。
相中見到JC就喺度餵緊人奶，完全無遮無掩，真係好大方呀！最緊要係見到JC精神好好，眾人展現幸福笑容，就知道佢哋多咗一位家庭成員係幾咁開心喇！
(on.cc東網)
