夫唱婦隨，太太劉嘉玲就表示：「我只是暫時性幫住老公，至於佢點解咁突然公佈，你哋見到偉仔本人，自己問番佢本人啦！」
天下無不散之筵席。影帝梁朝偉同王家衛嘅澤東電影公司嘅經理人合約已滿約，如以後要搵偉仔開工，就要搵梁太劉嘉玲。
偉仔今日透過短訊通知各傳媒話：「各位記者朋友大家好，我係梁朝偉，我同澤東電影公司嘅經理人合約已經圓滿結束喇，以後大家有任何工作上嘅需要，可以暫時聯絡我太太劉嘉玲，唔該晒大家。」夫唱婦隨，太太劉嘉玲就表示：「我只是暫時性幫住老公，做個聯絡人，等物色到適合經理人，我會交番俾新經理人處理。至於佢點解咁突然公佈，你哋見到偉仔本人，自己問番佢本人啦！」
據知嘉玲本身開設咗一間娛樂文化產業公司，從事電影同劇集拍攝，當中亦有經理人部，偉仔暫時就由太太間公司負責工作細節。嘉玲接受《蘋果》電話訪問，問到嘉玲日後要處理搵偉仔嘅工作，有機會需公開自己電話時，佢話：「要搵梁生嘅人，自己會有方法搵到我。」至於嘉玲開公司一事，她稱：「我有自己嘅娛樂公司係另一回事。自己公司係自己嘢，唔好混淆兩件事。我只係梁生未搵到合適經理人公司時嘅暫時聯絡人。」
自從梁朝偉拍完王家衛導演嘅《阿飛正傳》之後，兩人一直合作無間，偉仔先後贏過五次香港電影金像獎最佳男主角，係獲獎次數最多嘅一位，當中四部就係同王家衛合作。《重慶森林》、《東邪西毒》、《2046》、《春光乍洩》，堪稱部部經典。其中《花樣年華》仲成就偉仔封康城影帝。一導一演合作逾廿載，最後一部二人合作嘅電影，就係2013年上映嘅《一代宗師》。
(蘋果日報)
