恭喜晒安志杰(Andy)同Jessica C.(JC)，佢哋第二個Baby喺今個月19號出世喇，今胎係仔，與2歲姐姐Tessa，湊成一個「好」字。
安志杰透露太太入產房十幾分鐘，BB已經出世。囝囝中文名暫時未改，英文名就同貓王個名一樣，都係叫Elvis。Andy話﹕「太太19號作動，生產過程好順利，入產房十幾分鐘BB就出世。」Andy向來都係廿四孝老公，據悉已推掉幾個工作陪老婆生B，今次都有陪JC入埋產房。
Andy話：「BB出世一刻，自己好大surprise，因為係Big Baby，8.8磅，身長53cm，醫生都話好勁，好少咁大巨B，全家上下都好開心。」30歲嘅JC康復得好快，住院兩日已經可以出院，現已回家休息。JC話：「好多謝陀B後好多家人及朋友關心，最touch係阿姨專登坐長途機由芝加哥嚟香港，陪我待產。
而Andy媽咪同Andy妹妹都有飛過嚟等bb出世，全家上下都好開心，今次生產咁順利，感謝上天畀我咁大福氣。」問到會否再生？JC話﹕「順其自然，不過現在BB好細，就算再生都要等一段時間。大女見到細佬第一眼已情不自禁不停錫，又好細心take care細佬，好錫細佬，屋企人都好開心。」
JC亦冇中國人禁忌，之前一日仲去游水同行街，佢話：「希望囝囝身體健康！多謝老公，嫁到呢個老公我真係覺得好幸福、好幸運，Andy仲係好爸爸，今次入院48小時都全程陪住我。」
(蘋果日報)
