「擺咗三圍，其實都係同屋企人、好朋友食餐飯，無請圈中人。」問佢㨂噚日簽紙有冇特別意思？佢就話：「冇乜特別原因，係師傅㨂嘅好日，自己就想一次過簽紙同請屋企人食飯，咁就唔駛煩喇！」
28歲林芊妤(Coffee)喺今年3月尾同拍拖3年多嘅男友翟志榮入紙申請結婚，Coffee本來計劃同男友喺年尾結婚，不過因為尾發現有咗，所以將婚期提前，今次雙喜臨門，真係恭喜晒！
陀b5月嘅Coffee仲話婚宴一切從簡，只係同親友食餐飯就算，但係一直都未有透露日子，噚晚Coffee嘅好朋友喺ig嘅stories公佈咗呢件喜訊，Coffee喺酒店同翟志榮註冊，身穿白色露背長裙嘅Coffee，簽完紙之後，即刻好sweet咁嘴嘴，現場傳嚟唔少歡呼聲！
之後Coffee好感性話：「今日現場所有人都係我生命中最重要嘅人，我最好嘅朋友，我嘅屋企人，咁就夠喇，我覺得呢個係對我最好嘅wedding！」
Coffee噚日亦都喺fb更新個人狀況，同Weng Chak結婚。原來Coffee噚晚喺港島香格里拉酒店低調舉行婚宴，筵開三席，只邀請至親好友出席，Coffee今日接受《蘋果》訪問，佢話：「擺咗三圍，其實都係同屋企人、好朋友食餐飯，無請圈中人。」問佢㨂噚日簽紙有冇特別意思？佢就話：「冇乜特別原因，係師傅㨂嘅好日，自己就想一次過簽紙同請屋企人食飯，咁就唔駛煩喇！」
問Coffee噚日有冇做齊出嫁儀式？佢就話一切從簡，「冇接新娘，冇上頭，亦冇伴娘，遺憾冇請到好多圈中朋友，因為今次好難，同埋都好攰，等BB百日宴先一次過請朋友嚟，希望唔好嬲我啦！」從Coffee好友喺婚宴拍攝嘅短片所見，Coffee除咗同老公攬住，甜到漏情深咀嘴婚宴，亦一度感動落淚。問佢喊咗幾多次？佢就笑住話：「數唔到，不過都係開心眼淚。」
至於，平時經常論論盡盡鬧笑出唔少笑話嘅佢，喺婚宴上有咩笑料？Coffee就話：「冇呀，最搞笑咪老公扮唔記得帶戒指囉！」
(蘋果日報)
