黃貫中（Paul）同性感女神朱茵結婚6年，寶貝囡黃鶯話咁快已經5歲半，兩公婆一直好保護囡囡，極少畀佢曝光，早前Paul為《搖滾大俠奏》開騷，囡囡破天荒上台獻花後，估唔到最近Paul答應帶囡囡參加大陸真人騷節目，今日朱茵到機場送別兩父女，年紀小小嘅黃鶯要離開媽咪，傷心到喊實朱茵狂喊！
今日網上曝光Paul一家三口喺香港機場嘅相片，據知Paul獨自帶囡囡參加大陸真人騷《想想辦法吧爸爸》，呢個節目由《爸爸去哪兒》前導演謝滌葵負責。素顏朱茵現身送機，兩母女表現得難捨難離，黃鶯攬實媽咪喊到收唔到聲，眼腫腫鼻紅紅，十分慘慘豬，朱茵都忍唔住跪地抱實囡囡喊，最後一家三口更擁作一團！
相反，同時出發嘅洪天明三父子就表現冷靜得多，老婆周家蔚喺ig貼一家四口相並留言：「Hi everyone! I’m gonna be shooting for 24 days.電話會給收起來。沒法跟我聯繫敬請諒解！my phone getting confiscated.For 24 days.Bye!!」
有大陸網民亦野生捕獲洪天明帶兩子參與拍攝，將相片貼微博。
對於朱茵攬實囡囡狂喊，有網民認為有啲造作：「這一哭生離死別似的，戲真多！」
但亦有網民睇到好感動，留言力撐：「很正常啊，說不定是第一次要和女兒分開這麽久。」、「那孩子哭的眉毛都紅了，哎呀！」《想想辦法吧爸爸》係大陸真人騷新節目，以萌娃同明星家長為主，主要內容講由爸爸帶子女去旅行，體驗唔同嘅美景加深父子情，似乎與《爸爸去哪兒》如有雷同，實屬巧合。
(蘋果日報)
