藝人黃建東周六晚途經港鐵彩虹站時，聞得便利店職員大嗌「偷嘢」，立即與多名熱心途人追捕疑人，涉案男子被截獲及被接報警員帶走。
橙衫男拔足逃走。
見義勇為市民(左)截獲橙衫男，將其按在地上。
見義勇為的黃建東在事後卻遭到網民抨擊，指只是價值共40港元的麵包和焗豆，點解黃建東唔幫手畀錢？又唔幫口求情？
黃建東今日喺社交網舉咗「六點」詳述事件過程，表示當時出自本能幫助女店員，佢留言：「當我知道係發生咩事嘅時候，我有諗過個男人嘅情況可能好慘好肚餓，佢只係偷咗少少食物，俾（畀）人捉到亦肯俾返（畀番）錢，係咪應該就咁算數呢？但係首先，報唔報警係當事人話事，並唔係我哋側邊呢啲途人決定，必須要尊重番當事人。第二，無論個男人係咩情況都好，偷嘢始終係犯法係不對的，佢有呢個行動就必須為自己的行為負責。第三，當佢俾（畀）人捉到之後話『我俾返（畀番）錢你』，證明佢身上係有錢可以支付食物。第四，有街坊話呢個男人之前試過偷過好多次嘢，當然呢個係咪事實我唔會知道。第五，之後問返（番）便利店職員，佢話原來成日有人走來偷嘢，但係次次都捉唔到。第六，之前啲人成日話香港人好冷漠，但原來有起事上嚟有人求救要捉賊，大家係會願意停低齊心協力去幫忙。呢一點我係好感動的。」
黃建東又話每個人都有有唔同觀感，但係佢覺得今次做得啱嘅。
（on.cc）
