據知無綫搵律師研究過之後擔心合約細節上會有問題，所以唔敢搏，但電訊盈科就敢搏，結果就俾1750萬美金加200萬美金，即約1億5300萬嘅超荀價…
四年一度世界盃掀起全城睇波熱潮，今屆俄羅斯世界盃決賽周由電訊盈科旗下now TV同免費電視ViuTV取得香港獨家播映權，究竟，「小小超」李澤楷嘅電訊盈科係用幾錢買到呢個全球矚目嘅盛事呢？據《蘋果》收到嘅可靠消息，係超荀價1億5300萬，而無綫就因為「唔敢搏」而走寶。
上屆巴西世界盃，無綫以逾3億港幣買世界盃決賽周獨家播映，之後盛傳樂視出價逾4億搶到俄羅斯世界盃決賽周播映權，去年底樂視因為財困，於是將世盃播映權賣比nowTV同ViuTV。
據《蘋果》了解，樂視2年多前係以7000萬美金，即約港幣5億5千萬港元，喺國際足協（FIFA）嘅中介公司買入俄羅斯世界盃香港獨家播映權，分4期比錢，每期1750萬美金(約1億3733萬港元)，樂視比咗3期之後財困冇錢比第4期，由於合約規定第4期錢要喺去年12月1日之前交，否則樂視之前俾嗰3期錢全部作癈total loss，FIFA會將個播映權再攞番出嚟拍賣。喺咁情況下，樂視就搵無綫及電訊盈科等幾方面斟，內容係由佢哋支付第4期尾數，即1750萬美金，另外再加番200萬美金嘅簽約費比樂視。
不過，據知無綫搵律師研究過之後擔心合約細節上會有問題，所以唔敢搏，但電訊盈科就敢搏，結果就俾1750萬美金加200萬美金，即約1億5300萬嘅超荀價，攞到俄羅斯世界盃香港獨家播映權。而日前俄羅斯對沙地阿拉伯嘅世界盃揭幕戰，Viu TV就以平均10點收視（約66萬觀眾）撼贏無綫《晚間新聞》同陶大宇和郭可盈主演的重播劇《刑事偵緝檔案III》。
對於以超荀價1億5300萬買到今屆世界盃香港獨家播映權，電訊盈科公關回覆《蘋果》話:「No comment。」
(apple daily)
