31歲嘅佢，前年同惠英紅合作嘅《幸運是我》演出精采，成為其代表作之一，早前更憑《逆緣》人氣急升，順利「入屋」，不單曝光率激增，仲連其他生活（重點係感情生活）都備受關注。女友余香凝（Jennifer）一直陪佢捱過低潮，上緊位嘅家樂冇飛甩同甘共苦嘅女友，不止大方認愛，家樂仲話視對方係結婚對象，諗住一生一世一齊走下去咁話。
31歲嘅陳家樂早前憑《逆緣》中「爺爺」一角人氣急升（資料圖片））
不過，今日就有周刊指兩人維持三年幾嘅感情生變，原因係女友另結新歡，同一保險業從業員男子Victor過從甚密，仲拍到Jennifer數次出入男方寓所留宿。周刊向陳家樂「突襲」求證，陳家樂深呼吸一口氣，示意不認識Victor，諗咗陣，陳家樂終於表示：「其實早前我同佢分咗手。」
陳家樂不欲多談，轉身想走，最後才應傳媒要求停低受訪。問到分手可是最近嘅事？陳家樂開始有淚意，表示係最近嘅事，已經冇再聯絡，又稱希望大家可以俾空間大家。
至於係邊個提出分手，陳家樂只表示係大家坐低傾出來的結果。記者再追問是否不願分手同難以接受時、以及Victor是否第三者，陳家樂已不斷索鼻想哭，未再回應，最後由助手陪同下離開。
Jennifer接受訪問時，直認分訊，她說：「我同家樂的確係分咗手，係大家雙方嘅決定，但當中絕對沒有第三者，報道中嘅Victor只是朋友，唔想令身邊人無辜受牽連。總之我現時係單身，俾啲時間空間我同家樂。」
陳家樂凌晨接受訪問亦表示希望大家都畀啲私人空間佢哋，他說：「我哋最近係分咗手。好希望大家都畀啲私人空間我同佢。佢係我最好嘅朋友，佢令我成長咗好多，我會祝福佢。我以後都唔想再講咁多感情事，希望大家關注多啲我嘅事業。」至於陳家樂經理人Mani則表示：「分手並不是一件不好的事。」
其實上月初，有讀者見到陳家樂帶埋女友見家長，當時家樂回覆傳媒稱Jennifer成日家人經常見面，雙親對女友印象好好，佢仲話自己：「屋企人覺得我冇乜自制能力，有Jennifer喺度就可以令到我成熟啲。」上月陳家樂受訪時，亦承認已買戒指準備求婚，依家就儲緊錢，實行置業大計。估唔到未宣佈婚訊，兩人已然分手。
去年3月，Jennifer在吐露港公路近中文大學路段發生嚴重車禍，面部受傷，鼻骨爆裂，要到醫院接受治療。事發陳家樂都在場：「我做完嘢接佢收工，傾緊去邊度食嘢，突然間後面架車收唔切掣撞埋嚟，跟住推咗我架車埋壆，後面撞完到前面再撞，之後爆晒氣袋，嗰時都唔知發生乜事，大家都有幾秒冇咗意識！」他又謂擔心女友破相，更承諾會照顧她下半世：「呢段期間會搵去疤秘方。」
(apple daily)
