陳奕迅(Eason)以代言人身份現身旺角，為世界盃活動擔任揭幕嘉賓，原來讀書嗰陣，Eason已經好鍾意踢波，佢仲因為身型高大，最初係負責守龍門，之後轉為進攻球員，最愛頂頭搥！不過Eason笑言近年體力不足，有時追波會出現拗柴情況。
嚟緊世界盃開鑼， Eason話最希望梗係愛隊德國捧杯，佢仲自爆會去俄羅斯觀睇揭幕賽，佢勁興奮話：「我第一次喺現場睇世界盃，亦都係第一次去俄羅斯，以前最近都係做巡迴去到黑龍江，我有個疑問唔知嗰度食乜。」
佢仲話今次預計會睇兩至三場賽事，主要逗留莫斯科，其中有一日空閒，已經計劃做遊客遊覧紅牆。Eason嘅身形狀態回勇，佢話近年發現企得耐會膝頭攰，經了解後發現原來係肌肉力量唔夠，所以喺一個月前開始接觸健身：「每次做個半鐘，每星期做一至兩次，其實我好掛住自己個腮，一向都有俾人哦叫我減，但哦慣咗咪唔理，不過自己都覺得好多疾病都係管道塞引起，o依家做完健身流多汗好舒服。」
Eason仲自爆早前曾經有諗過去做手術去眼袋，不過諗深一層，做手術始終有風險，加上本身純尚自然，所以決定放棄做手術，選擇以運動排汗，佢笑笑口話：「我有諗過唔知會唔會自己脂肪強勁，如果做咗手術兩日後，眼袋出返嚟咪好唔抵！」
(蘋果日報)
