林子善上月底被爆單身空窗期嘅一段情慾錄音，當時林太Kary已經企出嚟撐老公，話「一向都互相坦白」，之後林子善夫婦仲去咗日本旅行。
今日林子善出席大台活動後被問到情慾錄音事件，係咪特登安排同老婆去旅行「補鑊」，但林子善否認，仲話一早已經計劃咗呢段時間去旅行，係補度蜜月，佢仲話老婆一早知道晒所有事，而且新婚不久爆單咁嘅醜聞，令佢哋兩夫婦之間關係更加強化，仲獲好多朋友支持。
不過，撐還撐，林太個媽咪（即係林子善外母大人）就同個女唔係咁一樣，林子善話外母傳咗3個短訊俾佢，問佢「搞乜嘢？」、「點解要搞呢啲事？」同「好自為之」，林子善話有同老人家解釋番，亦明白點解外母會咁緊張，好彩喺太太幫口解釋後，已經冇晒事。
林子善更重申，自己唔會一船踏兩腳，又認為同舊愛L小姐，再見後唔使做仇人，而佢亦唔怕再被爆料，坦言冇影床照，亦冇玩過乜嘢激情嘢，做嘅嘢都係好平常，自己完全冇壓力。
(蘋果日報)
