藝人陳展鵬去年於將軍澳租住一個單位，郤被「蒙面業主」指他提早退租，收樓時發現地板發霉變黑。而展鵬今日為新劇《天命》開工時，就帶同有力證據逐一反擊。
同前業主關係好
展鵬於電視廣播城見記者時無奈表示，於將軍澳這個屋苑，住了沒有八年都有七年：「好多住戶都好熟，我今次搬咗另一個單位後住咗唔夠一年就搬走咗，咁當然有好多問題出現啦！之前大約4月29、30號已經離開住所，以為Settle咗，但尋晚就有一啲報道，又話我租霸、又話我破壞地板，之前我所住嘅兩個單位，同個個業主都好好關係，交鎖匙時直頭一齊出嚟食飯影相，我覺得成件事好多因由，好難一次過講晒，但我哋對話係有cap低晒一啲對話相，大家唔好單方面聽晒一邊講，大家可以消化吓，我都明自己係娛樂圈人，有時都會遇到呢啲問題，但係我都係一個普通巿民嚟！」
「業主不停話冇問題」
問到有否如對方所說破壞地板及以白紙鋪在上面時，展鵬即謂：「其實差不多全部片同相，係我發畀業主，講畀佢知有乜問題，先講地板先，地板係兩、三個月時，佢一冷縮熱脹，已經拱起，係好危險嘅，咁有一次仲令我媽咪仆親，好大件事，依家腦震盪都仲醫緊，個業主不停話冇問題、會搵人修理，但不停等，之前睇樓、簽合約都係我媽咪去簽，我真係唔喺香港，同佢睇樓嘅都係佢隔籬鄰舍，係業主叫我媽咪租呢個單位。」
本來陳展鵬一直努力抑制怒火，可是一講到陳媽媽，陳展鵬即按捺不住。
「仲有一個令我媽咪都好氣憤嘅……入到去就知咩事啦，所有嘢都有問題，煤氣爐好重要。我千吩咐萬吩咐個煤氣爐好重要，因為我媽咪洗碗嘅時候，天氣凍，年紀大，隻手唔可以凍，要熱水。佢話：『得0架喇，我幫你check好晒，搞掂晒，換過晒啲新0架喇。』係入伙前，（去年）四月份已同佢講，煤氣爐要換過個新，搞下搞下搞到上年年尾先至換！」
「即係已經唔係拖一兩日……係幾個月，真係已經頂唔順，冬天真係太凍，我搵煤氣公司上去。你唔搞，我就自己搞，我俾番張單你，唔掂呀真係！燈嗰啲我可以幫你搞，但煤氣，大件嗰啲，我點幫你搞啫？煤氣公司仔係上過去check過，話要改位，要換，跟住佢話：『都係太貴，唔好喇。』都係我自己搵師傅上嚟。」
「有呢啲事發生嘅時候，你會覺得，仲有咩好傾呢？係咪？啲小問題已經咁多喇。好喇，跟住冷氣機，我都話維景灣畔我住咗咁耐，我會唔會整口釘落個冷氣機然後要你換呀？即係……如果我有做過，我雙手跛！我可以咁講！」
（蘋果日報/on.cc東網）
