馬黎珈而（前名黎姿，Gigi）昨日以CosMax醫學美容行政總裁身份到尖沙嘴，為九龍首間旗艦店舉行揭幕禮，圈中好友張可頤、林保怡、向海嵐、伍詠薇同張晉等到賀。
向海嵐對於楊婉儀抵押港姐后冠，佢話有留意新聞，但冇聯絡對方，相信對方暫時都比較忙，問到抵押后冠會否覺得可惜？佢話：「唔覺得可惜，后冠一直畀人感覺唔值錢，我當年就話值一百六十萬。」
向海嵐話一直將后冠放喺保險箱，多年來只係拎過出嚟一次出席港姐活動，佢透露多年前曾經同楊婉儀傾，不如將后冠鑽石製成其他首飾，但最終不了了之，大家都想留個紀念，最後佢覺得抵押后冠就好似其他人抵押物業一樣，唔使特別去看待。
張晉單獨現身，因為太太蔡少芬有工作在身，講到美容方面，佢話自從識到太太之後先懂得護理，他笑說：「太太畀乜我搽，就搽乜，我病嘅時候試過佢畀安眠藥我食，畀咗double分量，第二日叫咗好耐我都唔醒，我過份信任佢。」近日放假在家，兩位愛女特别黐身，噚日更每人攬住佢一隻腳唔俾佢去廁所。講到太太上載大肚舊相上網，是否有意再生？他即笑說：「唔使，夠啦！放過我哋兩個，兩個已經去唔到廁所。」
(蘋果日報)
