林欣彤與天堂鳥成員Tyrese被影到喺元朗吉野家撐枱腳，讀者仲目擊兩人手拖住手。
林欣彤起初都怕被人認出，食嘢前都係戴住口罩。（讀者提供圖片）
與Tyrese拍拖數年嘅余思霆似乎已經「聞到味」，噚日接受傳媒訪問時，被問到同Tyrese係咪已經分手？佢話：「冇呀！」但聽到話讀者見到兩人手拖住手，余思霆表現冷靜：「哦……哈哈（苦笑），我唔知，不如問番佢哋兩個啦！」覺唔覺男友一腳踏兩船？余思霆話：「我唔知，你問佢哋啦。（男友有冇異樣？）我哋呢排少見啲，因為工作忙。（相信男友？）信得過嘅……我好亂呀！」
2017年華姐冠軍余思霆（中）擊敗香港代表馮盈盈（右）
其實余思霆近日喺社交網嘅留言都變得好灰，「用忙碌將時間填滿，Be a better me~」、「睡不著，我的小腦袋要炸了，煩」等。
最近又留言：「人一生下就會哭，笑是後來才學會的。所以憂傷是一種低級的本能，而快樂是一種更高級的能力。像監製說的：霆霆妳的招牌是笑容，一定要多笑。憂傷一下下，就得再帶著笑容重新出發！來吧！#挫折只是一下下 #努力是永久的良藥 #霆霆妳可以的！#勉勵自己post」第二日又再開post：「雨過之後總會天晴。#去活吧 #笑一笑沒什麼大不了」。霆霆嘅煩腦，未知是否與感情世界有關，不過霆霆就否認：「同工作有關多啲。」
林欣彤（資料圖片）
傳媒聯絡到Tyrese與余思霆，Tyrese解釋：「其實只係普通朋友食餐飯，冇拖手乜都冇，多謝關心！其實本身同Mag係好朋友，有時食吓飯都真係好正常，希望你都應該明白。我唔想去追究邊個去報，我只係覺得好無奈😓我都唔想再影響到任何人，我同霆霆都好信任對方，有心了！」另外，問到余思霆同Tyrese係咪仲係男女朋友關係，佢以短訊回覆：「是的。」
至於林欣彤佢又點解釋同Tyrese嘅關係呢？佢稍後會出席公開活動，相信到時會為兩人關係親自解說。
（apple daily / on.cc）
