陳庭欣(Toby)近日被爆戀上彩豐行老闆楊振源（Benny），不過有報指道指Toby明知男友有一個正印女友劉依靜(Ruby)拍拖，依然積極進取，最後成功硬搶Benny，事後Ruby接受《蘋果》訪問話：「事情已經告一段落，Benny開心就得啦，Toby又靚又好叻，祝福佢哋！」
之後Toby出席活動直認同Benny交往，大家相處得好開心，仲話大家都係單身再開始。不過就算Toby公開認愛，都平息不到是非，有報道話男友嘅前妻喺fb留言要為離婚5周年而慶祝，一切盡在不言中。今日Toby喺灣仔出席一個婚紗展，Toby表示自己着過無數次婚紗，稍後亦會繼續有不少婚紗騷，問到佢會否有閃婚機會？佢話：「呢一樣嘢應該喺我嘅人生唔會出現，況且我都未去到結婚呢個地步。」
對於公開認愛後，仍然有不少是非，Toby話：「其實一向感情事係向自己交代，上次講係因為覺得近期有太多不實報道，但係冇諗過出咗嚟之後，依然有啲誇張誇大，我唔想有咁多是非，但係真正嘅事情應該我哋兩個自己面對。」
講到同男友與及佢嘅囝囝相處如何？Toby統統話OK，之後又提到男友前妻嘅留言，Toby話：「正如我啱啱咁講，唔想搞到其他人，我係圈中人，但係其他人唔係，唔希望大家騷擾其他人。」佢亦都話有睇過關於Ruby嘅報道：「有啲手法誇大咗，要了解一個人，要真正相處先知，感覺唔到有其他意思。」
跟住又問佢有冇為咗呢啲是非而唔開心，Toby就話：「有少少，不過我會KEEP努力做嘢，呢樣嘢係冇改變。」至於男友方面，Toby就話：「我入咗行8年，好多嘢都面對，正面同負面嘢會有，對方唔係，懇請大家唔好打擾佢，感情嘢係好個人嘅事。」
(蘋果日報)
