佢話同賴慰玲老公梁子峰相熟，所以陀B都有向佢哋兩公婆請教。舊年以為自己有咗，點知原來「食炸糊」，當時自己一度崩潰勁喊，點知去到今年1月發現真係有咗。佢就話預產期係9月29日。。。
主持六合彩近3年嘅舞台劇演員蔡運華，近日中咗大獎！不過就唔係中咗六合彩頭獎，而係同結婚3年嘅老公、亦都係舞台劇工作者陳彥聰有咗BB，現時懷孕6個月，係仔嚟㗎，對一直恨生BB嘅蔡運華嚟講當然開心過中六合彩啦。
近期蔡運華大住肚主持六合彩，不過睇電視又唔覺佢個肚好大。由於多年嚟唔覺有大肚婆六合彩主持，相信蔡運華亦係香港開埠以來首個大肚六合彩主持。蔡運華噚日同《蘋果》笑住話:「應該係開埠以來首個。」佢話自己將facebook改咗個名做「好運媽媽」，有啲六合彩fans都有發短訊畀佢，話佢主持嗰幾期六合彩帶嚟好運，前後中咗幾千蚊。
佢話:「我都聽朋友講見到大肚婆係一個幸運象徵。其實我之前都擔心(大住肚主持六合彩)，問番馬會啲同事同埋導演，佢哋都覺得就算喺六合彩節目見到肚都唔係問題吖。」問主持六合彩期間有冇身體不適？佢話:「雖然5分鐘live，但佢(BB)都好乖，冇乜點郁，反而之前啲同事將啲波入落攪珠機，我發覺佢好興奮，入緊波嘅時候係咁郁係咁踢，好似搞珠咁，到我正式時就好乖冇郁嚟郁去，好專心聽我報number。」
蔡運華話一早講咗畀導演知道，方便佢哋喺工作人手上作出安排，佢話:「我諗陀到8月到應該夠皮啦啩，希望到時唔會腫到豬頭咁啦。啲同事都有講笑，話o依家真係有一個真正嘅六合彩之子出現喇。」蔡運華話今次係第一胎，自己今年37歲，都算係高齡產婦，記得陀第2個月嗰陣，自己要拍港台《那些年●那些歌II》之《林憶蓮篇：情是永遠像花朵是有朝枯竭》，節目要通宵拍兩晚，所以嗰段時間係最辛苦。佢話：「另一個辛苦係我住喺唐樓，之前話胎盤有啲低，我都驚，日日要上上落落，有啲擔心，但o依家已經好返好多，可能本身我係舞台劇演員，體能操得比較fit啲，但我都未敢想像懷孕8、9個月時候究我係咪腫到豬蹄上唔到樓呢？但暫時都唔諗得咁多。」
蔡運華話同賴慰玲老公梁子峰相熟，所以陀B都有向佢哋兩公婆請教。佢話舊年以為自己有咗，點知原來「食炸糊」，當時自己一度崩潰勁喊，點知去到今年1月發現真係有咗。佢話預產期係9月29日，預計主持六合彩做到8月中就準備生B，而生完之後預計出年1月先至重出江湖。蔡運華話平時自己都有買六合彩，問有冇中過？佢話:「都係中幾次40蚊。我已經中咗大獎(有B)，好運留番比啲fans。」問佢有冇心水號碼，佢就話:「最近最愛『9』，因為BB 9月出世，又係狗仔。」
(蘋果日報)
