方力申到中環出席某品牌腕錶發佈會，現場仲見到小方嘅父母，原來為品牌鐘錶設計嘅女仔，係方家相交多年嘅世侄女，小方表示：「因為嗰個女仔畫嘅畫，曾經喺我爹哋畫廊做展覽，我哋好friend，所以嚟撐場。」記者笑問有冇機會對襯家？小方話：「佢啱啱結咗婚，當時全家都有祝賀。」
問到仲有冇其他世侄女？小方笑笑口話：「冇，我都準備搵契女，因為冇女朋友，所以先要搵契女囉。」記者攞番N年前小方同鍾欣潼（阿嬌）嘅緋聞講笑：「叫阿嬌生個畀你契？」小方即刻好大反應咁話：「嘩！咁遙遠，契唔係人哋叫我就會做，都要考慮，唔會自己主動話契。」
阿嬌噚日偕夫賴弘國返港（不過未簽紙…年底先至舉行婚禮），有冇送上祝賀？小方坦言：「冇，但我有睇報道，知佢啱啱度完蜜月返嚟。」
覺唔覺得阿嬌個樣好sweet？小方避答：「人哋啲嘢，我唔答啦。」阿嬌話12月擺酒，如果請到去唔去飲呢？小方話：「你要問番人哋啦，我唔答呢個假設性問題。」
(蘋果日報)
