劉德華嘅6歲獨生女劉向蕙今日幼稚園畢業，一向私生活低調、十分保護家人嘅華仔，下午3點幾孖老婆現身灣仔伊館，兩夫婦極罕地公開出席，親眼見證囡囡喺台上行畢業禮。溫馨過程被讀者葉太拍到。
早前已被傳媒拍到肚凸凸湊女 （資料圖片）
向蕙就讀嘅幼稚園今日舉行第53屆畢業禮，當輪到囡囡上台攞畢業證書時，華仔更興奮到企起身，而疑似大肚嘅華嫂就全程坐下，似乎想保持低調免引起注意。
葉太接受電話訪問表示，華仔現身伊館時，十分哄動，但更加引起葉太注意的是，「華嫂」朱麗倩肚凸凸孕味甚濃，育有兩子女嘅葉太語氣堅定表示：「佢肯定係有咗，睇個肚似有5個月。」
葉太話佢坐喺華仔夫婦隔籬，所以可以近距離拍攝兩人相片，從葉太提供相片所見，清楚影到華嫂嘅正面，着白色裙嘅華嫂雙手叠在腿上，肚部明顯隆起，的確孕味甚濃，與身旁嘅華仔專注望着前面，似等囡囡上台行畢業禮。
（讀者提供）
目前兩夫婦倩只育有獨生女向蕙，華仔曾坦言想追多個小朋友，但老婆年紀漸大，兩人已放棄追B希望。想不到現年52歲嘅華嫂，傳出再度懷孕嘅喜訊，早前佢戴口罩現身中環中建大廈，有指是去睇婦科醫生。
(apple daily)
