對上一次再踏舞台已經係六年前，為昔日合作無間嘅戰友兼老友黃偉文，喺紅館舉行嘅作品展擔任其中一位嘉賓。 育有兩名女兒，至今已經好大個喇。已經無喺幕前出現過好多年，點知琴日就被捕獲兩母女行街街，望真啲其實似兩姐妹多啲喎！
現年49歲嘅彭羚，98年嫁林海峰後，至02年推出翻唱專輯《給我唱過的男孩們》就退隱歌樂壇，至今已有十六年，多年嚟專心相夫教女，與林海峰育有嘅兩位囡囡林泳及林清，今年已分別18歲及13歲。噚日天文台雖然發出1號戒備信號，下午不時落大雨，但依然無損彭羚陪幼女林清購物興致，彭羚兩母女更手蹺手喺銅鑼灣shopping。
彭羚今日雖然不施脂粉，又將頭髮束起一個小髻，但穿上白恤衫加短裙仔嘅佢，企喺高度直迫佢嘅幼女身邊，猶如兩姐妹，母女感情亦非常好，全程有講有笑，林清更不時將頭挨近媽咪膊頭。兩人喺一間服裝連鎖店Shopping，林清每次睇中心頭好都會同媽咪研究一番。外形同親密程度同兩姐妹無分別~
(apple daily)
