靚媽孫慧雪自去年誕下囝囝Riley後，同時要兼顧湊仔同事業，見佢久唔久出席吓啲公開活動，而佢又好勤力咁喺社交平台更新近況，保持曝光率。
雖然話已為人妻同做咗人哋阿媽，但個「殼」（外表）都係要keep嘅，雪雪早前抱埋囝囝出席活動時，自爆收身唔成，反而越見大隻，難怪佢心急求收身良方。
今日雪雪喺自己Instagram度貼相，佢透露自己開始近排好興嘅紮肚收身，佢透露其實之前紮過一次：「我之前生咗3個月時紮過，但可能個人體質問題，或者子宮傷口太大（因為我係剖腹產兼生大碼B），所以產後3個月紮到第3日，就子宮出血，於是冇再紮！」
經過另一靚媽黃婉曼介紹，雪雪重拾心情再試紮肚，佢話希望自己可以如願，透過紮肚紮番細個骨架，佢仲笑言今次紮肚嘅感覺似「箍牙」，仲話盆骨有啲「冤」嘅感覺，佢更留言為自己加油。
(蘋果日報)
