當步入會場嘅時候，現場播住仔女親自錄唱嘅《陪著你走》，陳太即時感動得淚流不停，陳太話：「真係好感動同驚喜，覺得仔女都好孝順。」
慕詩國際集團老闆陳欽杰（Boby）同太太徐巧嬌上月26日結婚周年紀念，佢哋三個仔女陳柏熹（Harris）、陳蕾安（Tiffany）同大哥為父母喺泰國搞咗個神秘派對，請咗30位嘉賓到場，包括名模琦琦同周汶錡等。
Harris係今次驚喜「婚禮」嘅搞手，因為父母細個結婚時做嘢好拼博，冇擁有一個真正嘅大型婚禮，所以決定送上驚喜，Harris話：「兩個月前好秘密去準備，因為佢哋好鍾意去泰國旅行，今次佢哋約咗幾個朋友一齊去玩，我就秘密咁搵咗30個朋友去到當地，製造咗呢個Vow renewal wedding party。事前佢哋一直唔知，直至嗰日，佢哋以為普通同朋友去飲杯嘢，點知我安排咗化妝、髮型同一條裙畀媽咪，直至戴頭紗嗰刻媽咪就知道係一個驚喜。」
當步入會場嘅時候，現場播住Tiffany同大哥親自錄唱嘅《陪著你走》，陳太即時感動得淚流不停，陳太話：「真係好感動同驚喜，覺得仔女都好孝順。」陳太仲爆Harris幫佢換衫時緊張到手震。而Harris同哥哥就分別送上訂製嘅戒指同公仔作禮物，婚禮全程充溫馨感動。爸爸陳欽杰本身諗住同朋親友去泰國新屋，一齊放鬆吓，三個仔女安排咗party，好感動，朋友都好有愛：「多謝晒三個仔女咁有心思，好難忘、好開心好有驚喜。」
另外，日前喺網上流傳咗條片，片中所見Harris、妹妹同人妖跳舞，Harris慘被玩，仲被人剝衫兼摸重要部位，佢表現尷尬不停閃避，相當搞笑。
(蘋果日報)
