人妻吳雨霏（Kary）懷胎9個月，今個月就係預產期，據知Kary為老公洪立熙（Brian）一索得男，9號就踏入32歲嘅Kary，好大機會兩母子都係雙子座。雖然臨盆在即，日前傍晚約5時，Kary挺巨肚孖老公拍拖現身金鐘太古廣場，着背心貼身裙嘅Kary肚大如籮，似一個吹脹嘅幸福波波，可能進補得宜，塊面仲圓潤咗好多，氣色紅撲撲。
做柴可夫嘅Brain喺停車場泊好座駕後，體貼細心嘅佢專登行到乘客位，幫老婆扶住度門睇實落車。之後兩人十指緊扣行去戲院，其間Brian表現得好緊張老婆，又拖又攬腰呵護大肚Kary，可能臨近生B關係，Kary嘅雙腳開始腫脹，着價值約$5,100嘅Gucci踩踭波鞋，由於肚大如籮行得比較慢，老公都行慢啲就老婆。
到達戲院之後，兩人先去排隊買飛，原來佢哋係睇Marvel最抵死最搞笑嘅三級英雄片《死侍2》（Deadpool），買完戲飛後再去買兩支飲品同少量零食，散場後兩人拖手步出，全程都好sweet，之後佢哋上咗三樓嘅皮具品牌名店，買咗一個卡片套，由老公負責碌卡畀錢，Kary仲攞手機影張收據。
濕平後兩人又去返戲院，原來係問職員可唔可以攞免費泊車優惠，十分慳家，其後雖然發現記者在場，但Kary都表現大方，同老公攬頭攬頸行去停車場攞車返歸。
臨盆在即嘅Kary期待BB出世，日前喺社交網貼「June」相並暗示寫道：「Can’t believe half a year is gone. Hello to my favorite month of the year!!!」醒目嘅網民都留言祝福：「好好養好身子，就快有得見太子啦！」
(蘋果日報)
