陳慧琳（Kelly）同張智霖（Chilam）今日喺中環出席月餅代言活動，Kelly連續12年擔任代言人，表示合作愉快酬勞滿意，一年一度盛事，Kelly都會將月餅送俾親友，自己嘅囝囝都會食。
之前都有廣告商邀請Kelly母子檔拍廣告，佢話老公可能介意囝囝上鏡：「我就冇所謂，但影相時休息時間要o氹佢地，即係搵自己笨。」Kelly話反而覺得囝囝鍾意唱歌，早幾日喺學校表演時聽到，一班同學中認到大仔劉昇（蝦餃仔）把聲：「冇咪佢好大聲，但音準就要練習下。但我平時練歌佢會叫我細聲啲，可能唱來唱去嗰幾句佢覺得悶。」
父親節下星期就到，Kelly會幫忙囝囝準備禮物俾老公，佢又話囝囝曾用紙製領呔，Kelly笑言：「燒咗佢，下次唔用紙，用紙黏土做，仲可以用。」而Chilam喺父親節正日喺上海工作，所以就話唔怪人哋同自己節日慶祝：「母親節重視啲，我善於隱藏自己情緒，張家嘅男人都係內歛啲，其實都係羊毛出自羊身上，佢健康快樂成長就係禮物。」
問佢囝囝會唔會講「我愛你」？Chilam話：「好難，男仔性格唔會，但我哋常擁抱，俾我抱得時我會抱多啲，雖然佢高，抱起時腳可以掂地。」
(蘋果日)
