「這個男人今天大日子，和他緣起於課堂，從師生，到台上拍檔，到導演演員，其實是兄弟，夠資格說一句，你終於大個仔了，從想像不到結婚到終於成家立室，還娶到一個懂你又漂亮的老婆，你們一定會幸福的，你從來撑我，今天我撑硬你。」
喺電影《29+1》飾演周秀娜男友嘅楊尚斌(Ben)，原來噚日終於做咗老襯喇！
扮黎明參加歌唱比賽入行嘅Ben，被稱為「黎零」，佢亦曾經係跳唱組合Bro5嘅成員，去年拍攝彭秀慧嘅電影《29+1》開始廣為人識。16年，Ben向任職模特兒嘅女友Bowry求婚成功，噚日佢哋終於舉行婚禮，踏入人生另一個階段。圈中好友王宗堯、彭秀慧、周秀娜亦有出席其婚宴，而彭秀慧更從新娘子手上接過花球，佢喺ig留言話：「從來，係從來，出席所有婚禮都不會搶花球，今天擔任司儀，根據新娘意願不拋花球，她說要親手送一個靚tag，之後竟然得到新娘轉身送上幸福。好啦！我接受，我的回應是：幸福總在你毫無防備的時候隨手可得啊！謝謝！」
原來彭秀慧同Ben相識多年，為Ben嘅婚宴擔任司儀，佢喺另一個post到留言講到：「這個男人今天大日子，和他緣起於課堂，從師生，到台上拍檔，到導演演員，其實是兄弟，夠資格說一句，你終於大個仔了，從想像不到結婚到終於成家立室，還娶到一個懂你又漂亮的老婆，你們一定會幸福的，你從來撑我，今天我撑硬你。」
身為好友嘅王宗堯接受《蘋果》訪問時話見到Ben結婚真係好開心，追問咁有冇觸發到佢都想結婚，宗堯就話：「結婚呢啲嘢唔可倉卒，講timming。」佢再話：「真係好開心呀，睇住佢(Ben)同女友拍拖五年，修成正果，見佢由唔相信婚姻行到結婚呢個階段，見證住佢成長，了解佢人，睇到佢同太太默契，佢太太對佢包容，愛佢身邊朋友係好感動。」
而Ben今晚亦回覆本報指好開心，可以同大家分享，問到何時同太太去度蜜月，佢就話：「未知6月頭或去度蜜月，但未訂日期。」
(on.cc)
