2018年港姐⋯⋯誕生咗喇？
睇真啲，佢哋其實係98年港姐冠軍向海嵐、亞軍趙翠儀同季軍吳忻熙（前名吳文忻）。當年選美，大家年紀少，台下爭到台上，不過人越大越珍惜過去，始終識於微時朋友最珍貴，今年係佢哋選咗出嚟20周年，噚晚向海嵐、吳忻熙同趙翠儀，以及當年其他落選港姐約咗出嚟Re-U，吳忻熙今日仲喺社交網po相，佢留言：「Our 20th anniversary！是否比20年前還漂亮？！」
據知噚晚聚會，呂麗君都想出席，但咁啱出咗埠，所以未有到場。眨吓眼20年，當年三甲仲齊齊戴番后冠影相，時間飛逝，冠軍向海嵐仲喺幕前工作，佢o依家有幫亞視做主持，活躍演藝圈，亞軍趙翠儀同季軍吳忻熙都升呢幸福人妻，吳忻熙仲係兩女之母，佢不時社交網貼出親子相，老公錫到燶，大晒溫馨。趙翠儀最好生養，先後生咗兩子一女，退出幕前轉咗做傳銷。
噚日仲係趙翠儀牛一，成班好姊妹仲同佢慶祝。大合照當中仲有當年落選港姐，呢班失蹤人口真係唔認得幾多個，但當年湊佢哋嘅保母Rosa竟然完全冇變，佢哋又喺幾位保母中㨂冠亞季，畀佢哋戴后冠影相。
《蘋果》今日打畀吳忻熙，佢話噚晚玩得好開心，席間話當年，佢仲問：「我哋係咪靚過以前？」其實女人有時有閱歴會更有味道，吳忻熙都好認同話：「有閱歷更漂亮。」
佢話大家計劃搞個20周年紀念trip:「預計暑假去玩，但唔知幾多個女仔可以去到。」唔知到時出trip着唔着泳裝呢？
(蘋果日報)
