馬德鐘落咗好多心機，但最後宣布。。。仲留言話非常感激大家，而太太竟然話呢個係好消息，佢留言：「很高興你終於可公佈這好消息！」
「馬神」馬德鐘除咗拍戲，佢近年進軍飲食業，前年喺尖沙嘴同屋企人斥資7位數字開咗日本餐廳，生意唔錯。舊年7月再喺紅磡黃埔開蠔吧兼酒窖，有指投資千萬。
不過馬神今年4月，先壯士斷臂，執咗開業唔夠一年嘅蠔吧同酒窖；事隔唔夠兩個月，馬神今日再喺fb公佈尖沙嘴嗰間日本餐廳都執埋。其實當日馬神開呢間餐廳時，係佢馬家六兄弟姊妹夾份一齊搞，用作紀念亡父，餐廳個名仲用咗馬爸爸名字中間個「松」字。馬神為餐廳落咗好多心機，出錢出力，仲成日落去巡舖，親自招呼人客，可惜最後都要關門大吉。
馬神昨日留言：「#結業通知#由2018年5月1日開始，我司屬下在尖沙嘴經營之『松日本料理』，已正式結束及易手，其註冊商標亦已撤離上址。上址之所有業務及舊員工均與我本人無關。如發現這註冊商標未經許可仍有人擅自使用，務請通知我們。最後，非常感激大家過往對我們的支持！」
馬太張筱籣亦轉貼老公貼文後留言：「很高興你終於可公佈這好消息！拿得起，放得低！可以真正過自在自主的人生！」
《蘋果》聯絡馬神，問到佢餐廳結業一事，佢只話：「不做了！哈哈。」語氣輕鬆。他補充謂：「香港嘅營商環境實在太差，請人亦困難，要保持食品質素更唔容易，感謝上天喺我嘅人生裡面，俾我呢次經營飲食業嘅經歷，啟發咗我對飲食健康嘅關注，好多反式脂肪食品，好多生食嘅細菌，動物脂肪嘅害處等等嘅問題。依家我嘅食用品，大多以素食及有機食品為主，感覺我身體健康咗唔少。依家唔再經營飲食，我可以更專注我自己最熱愛嘅演藝事業，亦有更多時間享受生命，多做運動。而我太太終於可以做番佢嘅專業喇。呢段時間真係辛苦咗佢，要幫忙我處理業務，真係要講聲感謝！」最後馬神稱無意再開食肆：「唔會再做，減少殺生！」
(蘋果日報)
