「係呀係呀生咗喇！呢個大隻過哥哥呀，一出嚟醫生都話佢大隻，係大隻妹，有3.75kg，我都想生重啲嘅，大隻啲易湊啲，o依家都叫肥肥白白架喇！希望佢健健康康啦！」
31歲嘅前新聞小花蔡雪瑩（Snowy），16年4月嫁畀全國政協朱銘泉兒子、上市公司太子爺朱威霖（William），同年8月已經幫朱家添丁，生咗得意B仔Wesley。
去年年底，Snowy肚凸凸出席活動宣佈再次造人成功兼陀B囡，原來昨日已經「卸貨」，剖腹誕下3.75kg，即8.25磅重嘅B女，中文名未改，英文名就叫Sheryl。
Snowy兩年抱兩，佢昨日接受《蘋果》電話訪問話：「係呀係呀生咗喇！今日下晝出世，呢個大隻過哥哥呀，一出嚟醫生都話佢大隻，係大隻妹，有3.75kg，我都想生重啲嘅，大隻啲易湊啲，o依家都叫肥肥白白架喇！希望佢健健康康啦！」
問佢畀囝囝見咗妹妹未？Snowy就話：「頭先妹妹推上嚟嗰時應該見到喇！但o依家就安排咗佢返屋企先！其實老公今日一早已經帶咗囝囝嚟等妹妹，而兩星期前，我哋已經同佢講妹妹就嚟出嚟，叫佢Kiss妹妹，同埋買定玩具畀佢，話係妹妹送畀佢嘅，咁希望佢唔會妒忌會鍚妹妹啦！」
Snowy又話老爺、奶奶同媽咪都好緊張，佢生緊嗰時已經喺手術室出邊等，已經見咗孫女。講到今次心情，佢話：「陀佢嘅時候無上次咁緊張，但臨生都係好緊張，阿囡出嚟喊得勁過哥哥，我聽到佢喊我都喊，老公全程陪住我，佢都好開心呀！」
(蘋果日報)
