黃曉明最近喺大陸宣傳新戲《無問西東》，自爆35歲那年曾患輕微抑鬱，覺得自己喺人生道路上做錯好多選擇，例如選錯好多戲，甚至被狠批演技唔好，令佢覺自己陷入人生低潮。
回想當年受抑鬱困擾嘅情況，曉明坦言當時完全唔想見人，甚至自卑到一個極點：「連看到小貓小狗都覺得牠們在鄙視我。」
曉明話後期靠健身發洩，但真正令佢走出低谷，就係老婆大人Angelababy，曉明表示：「結了婚之後重心都放在家人身上，家人最重要，有了孩子彷彿多了一層盔甲。」
對於曾被彈演技唔好，曉明自認唔係天生演員材料：「我的人生本不該得到這麼多，有了這個好運，我應該承受。」有網民揶揄：「演技不好被批評就會抑鬱……這是玻璃心？」不過喺36歲呢年，曉明憑《中國合伙人》獲金雞獎影帝。
現年40歲嘅曉明憑大陸劇《神鵰俠侶》、《新上海灘》、《鹿鼎記》等走紅，當年佢同Angelababy拍拖時，紅過女友嘅前度陳偉霆，爆出一句「而我不知道陳偉霆是誰」成為經典，o依家陳偉霆喺大陸越嚟越好，工作做到冇停手，相反，去年做咗老竇嘅曉明，為咗唔想錯過囝囝成長過程，幾乎停工一年。
(蘋果日報)
