女星陳茵媺（Aimee）出席英皇電影《某日某月》首映禮，Aimee以露肩裝上陣，與老公陳豪（阿Mo）拖到實到場大晒恩愛。
問Aimee會否怕被劇情感動而眼淺？她表示未有睇過《某》片，希望不會落淚失場，阿Mo則說：「佢湊仔都辛苦，好難得可以從屋企出走，嚟到撐場。」問到Aimee是否已一段時間未有二人世界？Aimee秒答：「YES！都有幾個月喇，身為家長真係好難有時間，難得出嚟當拍拖！（今晚玩夜啲？）咁會好大件事，妹妹每朝五點就醒，我哋就要跟住醒，幾夜都係咁早起身。」
問到大仔是否代為照顧妹妹？阿Mo說：「仲未識Take care妹妹，我期待佢照顧到自己先，咁已經舒服好多。（小朋友有問你哋去邊？）有問去邊，仲話佢又嚟，又問套戲係講咩，我哋話佢聽係講愛情嘅，佢哋好多嘢都未明。（小朋友睇過Aimee做戲？）冇，太多大人情節，等佢大個啲先。加上平時都唔開電視，我哋睇都要等佢哋瞓咗先，Aimee會揀卡通畀佢哋睇，都係有教育意義。」
提到暑假將至，阿Mo會否擔心老婆辛苦而推劇？他說：「我都就開劇，要返內地開工。（冇得家庭旅行？）Aimee會帶佢哋返加拿大。（幾日時間都冇？）我都想呀！（明年爭取吓？）人在江湖身不由己呀！」Aimee表示不捨得老公辛苦頻撲，因大仔要上暑期班，今次只能留一個月與公公婆婆相處。
(on.cc東網)
