黃宗澤、吳卓羲、黃智雯、陳凱琳同王敏奕等人，噚晚喺尖沙嘴出席劇集《飛虎之潛行極戰》慶功宴。套劇菲嘅犯駁位同破綻又成為網民photo hunt熱點，但係劇集喺大陸點擊卻破32億，黃宗澤仲自爆已落實拍續集，更笑言：「如果個故仔講我未死，咁我都應該有份（拍）。」仲話唔介意除衫騷肌，認為係「男人嘅例行公事」喎。
反而吳卓羲最擔心嘅唔係有冇份拍，而係幾時拍，仲為黃宗澤擔心埋一份，驚冬天開拍要露肉會凍親喎。講到個劇錄得32億點擊率，吳卓羲笑言：「其中30億點擊都係俾咗三哥 （苗僑偉），我得幾千咋。」講到話開續集會否加價，佢就話有就當然好啦，仲話如果用番以前最初嘅舊價，連食個快餐都俾唔起咁話……同場仲有繼續開心展示新髮型嘅陳凱琳同黃智雯。
早前黃智雯憑《三個女人一個因》事業更上層樓，演技備受肯定，但感情生活同樣受注目。去年被揭搬咗去有米男友詹文天位於東半山嘅千呎豪宅「試婚」，但今年初原來已靜悄悄搬返新蒲崗「娘家」。
黃智雯同詹文天拍拖4年，多次傳婚訊，更有傳聞指女方疊埋心水今年嫁，但最近口風突轉，以事業為重為由、向外稱唔急住嫁。噚晚再問佢，佢都係話太忙：「正拍緊套時裝劇，七月仲有戲，所以一直未定婚期。再睇下邊日係好日子啦，依家以工作為先。」
(蘋果日報)
