鄭俊弘（Fred）與何雁詩前年10月到美國為無綫拍節目時秘密撻着，秘戀近半年後，被Fred當時未婚妻踢爆偷食，最後男方情歸新歡何雁詩。去年4月兩人拖手認愛，但仍要面對各種問題，有指公司施壓，何雁詩爸爸又唔係太喜歡鄭俊弘等，令二人屢傳情變。
日前蘋果讀者Fion透過《爆相爆片》透露早前晚上八時許，見到Fred同何雁詩喺西貢一間餐廳撐枱腳，佢哋逗留逾兩小時，Fion話：「佢哋食咗好耐，但全程冇乜交流，各自叫嘢食，之後就你有你睇手機，佢有佢睇手機。」Fion話餐廳內大部份都係外國人，所以冇乜人認得佢哋，食完之後就由Fred負責埋單。
何雁詩噚日接受傳媒訪問時話經常會同男友一齊食飯，問到好少傾偈，佢笑笑口話：「我諗好多情侶都係咁，哈哈，經常話我哋分手邊緣，但實際上我哋super OK」。何雁詩再補充：「I think we are just really comfortable and happy with each other.So we are Okay with doing whatever we want when we spend time together.(我覺得我們擁有彼此已經非常快樂，無論我們想做甚麼，只要我們在一起就足夠了)」，真係冧到爆！
何雁詩透露現正一個人去旅行，佢講笑話：「唔好又話我們分手或去散心，因為佢真係好擔心我，哈哈。」
何雁詩因為抑鬱症減少幕前工作，佢早前參加EFG Hong Kong ladies open嘅哥爾夫球賽，直言對病情有幫助，佢話：「Yes much better! golf is my cure!(好咗好多，哥爾夫球係我嘅治療方法)」。
(蘋果日報)
