容祖兒日前就係最危急關頭，攞到美國簽證，出發到洛杉磯出席好姊妹鍾欣潼(阿嬌)同台灣「醫學界王陽明」賴弘國嘅婚禮，今日祖兒就好開心咁同經理人霍汶希(Mani)喺美國返港，講到阿嬌結婚祖兒就滔滔不絕，但講到佢同劉浩龍嘅分手傳聞，祖兒就有啲腼腆，尷尷尬尬咁話：「哎呀，唔好講我啦…」
之前有傳祖兒同拍拖多年嘅師兄分手，兩位當事人都冇正面回答過，而上月師兄喺旺角麥花臣場館舉行演唱會，祖兒亦大方撐場，上星期一(21日)著名填詞人黃偉文（Wyman）就49歲生日，好多人都有出席Wyman嘅生日會，包括師兄同祖兒，佢哋更不但同場現身，仲身貼身咁企埋一齊添喎！
咁今日記者再講到Joey早前同劉浩龍（師兄）一齊去賀黃偉文（Wyman生日，係咪證明佢同師兄冇事喇？）
Joey反問：「咩咩咩冇事？（傳聞話你哋分手吖嘛…）哎呀，唔好講我啦，唔好講咁耐之前嘅嘢啦。講阿嬌咪得囉……」問到佢係咪單身，Joey諗咗一諗後答：「都OK啦，開心啦！」接着Joey就好開心咁跳住咁同記者講拜拜，然後上車離開。
Joey好似好春風滿面咁！
(APPLE DAILY)
