十年人事幾番新，喺無綫拍過劇嘅演員，即使觀眾唔記得一啲藝人個名，不過有啲望落又會記起喺邊套劇見過佢哋，又會諗起大家真係「好耐冇見」。
由於佢外貌甚有氣質，所以喺劇集主要演主角媽媽，或者豪門闊太等角色，之後嘉儀姐為咗一心一意照顧患病嘅老公，而放棄幕前演出。
現年71歲嘅資深女演員陳嘉儀，同郭鋒係無綫第一期藝員訓練班畢業，曾經拍過《山水有相逢》、《京華春夢》、《十月初五的月光》同《金枝慾孽》等受歡迎劇集，係好戲之人。不過，10年前嘉儀姐離開咗無綫，除咗舊年無綫播番10年前倉底貨《蘭花劫》之外，觀眾都未有機會再欣賞佢演出。原來，嘉儀姐因為要全心全意照顧患病嘅老公而放棄幕前演出，真係愛夫情切。
《律政新人王》中演林峰媽咪「袁小芳」，戲份甚多。無綫電視截圖
重返大台後第一部劇《十月初五的月光》，演郭峰妻子「馬冰心」。無綫電視截圖
倉底劇《蘭花劫》係陳嘉儀最後出街作品。(劇照)
讀者陳先生透過傳媒報料，話日前上午11點幾，見到嘉儀姐同老公喺將軍澳PopCorn商場搭扶手電梯落地下，估計兩公婆剛剛食完嘢，嘉儀全程小心翼翼扶住老公出入。陳先生話：「佢全程蹺住老公隻手，兩公婆好恩愛，不過睇佢先生行動有啲緩慢，好似唔係好舒服咁。」
媒體之前打俾嘉儀姐，佢話同老公喺將軍澳區住，所以撞見佢哋唔出奇。問佢當年點解離開無綫，以及會唔會再拍劇時，嘉儀姐就解釋原來係為咗照顧佢老公而離開無綫。佢話：「以前老公冇事就話拍吓劇，但呢幾年我老公有病經常出入醫院，我要照顧佢起居飲食，陪佢睇醫生、叫佢定時食藥，佢行路我都驚佢跌，要扶實佢。老實講，我哋一把年紀，仲有幾多年喺人世啫，我有時間梗係陪我老公照顧佢啦，仲拍乜鬼劇，梗係家庭緊要啲啦！再加上拍劇咁辛苦，夏天拍冬天戲咁，唔通我揀淨係秋天冬天先至拍劇咩？」
嘉儀姐話自己有兩個仔，其中一個已經結婚，仲生咗個孫仔，今年6歲，自己得閒佢都會同老公去睇吓孫仔，及做吓義工照顧老人家，生活相當充實。
（apple daily）
