郭富城噚晚喺鰂魚涌出席雜誌活動，一身西裝打扮，加留鬚頹廢look現身嘅城城，原來係為新片《六月的秘密》至搞到個形象咁，佢同女主角、大陸女演員苗苗早排喺美國紐約拍外景，城城話：「我哋要喺美國拍兩個月外景，部戲係向全天下嘅爸爸致敬，劇本好吸引，我做爸爸角色好多次，但今次就有個23歲嘅女，苗苗做我個女。」
《六月的秘密》由小美監製，阿燦廖偉雄、張可頤參與演出，城城話以前睇經典嘅《秋月的童話》時，心諗自己有冇機會喺美國唐人街拍戲呢？o依家有機會喇！電影係講一段父女情，故事好打動到佢。至於做咗爸爸嘅城城，會唔會演爸爸角色更加投入？佢就話唔一樣：「故仔講我係一個喺唐人街長大嘅點心師博，拍攝前特登去學整點心，月餅、蝦蛟、叉燒飽我都識整。」
問到老婆方媛（Moka）有冇試食？城城話：「味道唔錯㗎！不過佢未有機會試，我離開香港已經個幾月。」
之前嘅母親節，Moka喺微博公布囡囡已經識嗌「媽媽」，城城話阿女仲未識叫「爸爸」，佢一副失落樣話：「 佢見到我個樣有少少驚，搞到我有啲心噏，因為我啲鬚嚇親佢，希望佢大個會明白，爸爸為電影離開一段日子，等佢大個會畀佢睇番呢部作品。」
城城仲話個留鬚造型搞到佢好唔舒服，好唔自在，好想剃鬚，而下個月嘅父親節，亦會喺美國拍戲度過。
(蘋果日報)
