應采兒昨日一身科幻造型，去到澳門為最新科幻活動展覧《外星爭霸》宣傳。
應采兒同陳小春嘅愛兒陳胤捷（Jasper），今年幼稚園畢業升小一，應采兒話5歲嘅Jasper學校升小一其實係等同正常學校K3，o依家Jasper忙緊畢業禮綵排，應采兒：「到時佢會畀爹哋媽咪一個驚喜，暫時知道佢會拉小提琴，佢本身冇學小提琴，係學校安排佢喺學校練習，上次佢喺學校表演唱聖歌，已經搞到我感動到喊。」
應采兒表示，不單止預先通知小春到時請假出席畢業禮，家庭上下都會總動員，應采兒話：「到時成家人都要去，因為係好重要，全家一齊參與。日前就同小春一齊返學校出席家長會，了解Jasper喺學校嘅生活。」
應采兒指Jasper本身唔係太好動，若同學玩得太粗魯會不太喜歡，應采兒話：「佢見到一啲球類活動，大家喺度爭波，佢會問點解要咁粗魯。可能我同小春都冇乜運動細胞，佢主要鍾意啲較靜嘅活動，例如音樂。o依家主要學廣東話，有時會有啲口音，唔明白嘅都會問我。」
就嚟放暑假，應采兒安排一家人飛去外地旅行，對於會唔會追多個，應采兒話：「自己都唔知，因為覺得唔可以隔太耐，感覺o依家一個比較輕鬆，隨時鍾意去邊就去邊，等到5歲先至嚟追比較難，小春聽到都話，吓！仲嚟多過？自己都覺得需要好大勇氣，如果再有BB，又要重新嚟過，打針、返playgroup、家長會，Jasper都有建議過話想有個BB，佢會問點解人哋有佢冇，其實冇又好有又好，我叫佢大個自己有。」
(蘋果日報)
