熱到大汗叠細汗，又見到工作人員為營造飄逸感覺，都有為準新娘拉高頭紗，佢身上嘅婚紗款式復古，前面密實，卻展示大露背，同時讓佢一嘗做「影后」滋味。
江若琳同蕭潤邦（Oscar）已訂好今年12.23喺香港擺酒，距離婚期尚有半年多，一對準新人都要開始籌備，佢哋已喺紅磡訂好酒店場地，又揀好婚戒，跟住當然係要影番輯靚靚婚紗相。
讀者朱小姐噚日透過《蘋果》嘅「爆相爆片」，分享咗江若琳同Oscar喺西貢外景影結婚相，朱小姐話：「我去咗西貢獅子會自然教育中心嗰度行山，咁啱行完山準備走，當時大約中午12點左右，就見到江若琳同未婚夫喺嗰度影相，江若琳着住露背婚紗，Oscar着住黑色禮服，正午熱辣辣，佢哋又攬又錫，我都熱到滴汗，難為佢哋仲要黐埋影相。現場仲有其他情侶拍攝婚紗相，但佢哋呢對工作人員最多，約有十個人。」
噚日天文台有發出酷熱天氣警告，但喺讀者朱小姐提供嘅兩條手機短片中，就見到江若琳同Oscar分別着住婚紗同禮服，喺樹蔭低下進行拍攝，仍然係熱到大汗叠細汗，佢哋仲要擺出連體嬰放閃動作，影婚紗相背後嘅另一番辛酸，只有佢哋自己知喇。
喺短片中又見到工作人員為營造飄逸感覺，都有為江若琳拉高頭紗，江若琳身上嘅婚紗款式復古，前面密實，卻展示大露背，同時讓佢一嘗做「影后」滋味。
之後瞬間已轉到深水埗繼續影。
據知，江若琳同Oscar輯婚紗相玩轉港九新界，佢哋揀咗平日最鍾意去嘅幾個景點影婚紗相，平時拍拖好鍾意食茶記同車仔麵，所以今次特意揀番去西貢、慈雲山同深水埗呢幾區，貪呢地方有熟悉嘅味道。噚日下俾5點幾，江若琳同Oscar同攝影隊轉咗去深水埗，呢度可以話係佢哋主場，因為佢哋兩間食肆就喺附近，所以Oscar同江若琳索性喺店外取景，由街頭影到街尾。
着住便服嘅Oscar先落七人車打點一下，跟住佢再返上車，同未婚妻江若琳暱埋拉簾於車廂內換禮服婚紗，跟住就落車開始拍攝。平日經常性放閃嘅兩人鏡頭前後都sweet爆，做出慣性拖手咀嘴親暱動作。
影得婚紗相，當然有指定動作！Oscar應攝影師指示錫江若琳額頭，江若琳回吻未婚夫臉頰，佢哋拍得自然流暢，快拍大約15分鐘就收工再跳上車離開，Oscar同江若琳好有禮貌同記者講拜拜。
《蘋果》噚日致電江若琳再次恭喜佢，江若琳回覆話：「今日影婚紗相幾辛苦，天氣好熱，走勻我哋由細到大對我哋好有意義幾個地方，曬到燶咁滯。」Oscar則大呻差點中暑。
(蘋果日報)
