黃秋生以藝術總監、編劇及演員身份，去到大角嘴出席舞台劇《夕陽戰士》記者會，同場出席包括有劇團總監甄詠蓓、導演方俊杰，演員鄧智堅、張銘耀、邱頌偉及馮志佑。
黃秋生喺活動上獻唱英文歌曲《Stand by me》，又高舉該劇名嘅黃色直幡，秋生笑言：「原先掛喺獅子山頂。」
黃秋生笑指今次角色係演一個骨灰龕，秋生話：「 會以幻想、夢境出現，今次要搞埋劇本都幾辛苦，過兩日要飛去英國配音，之後去美國探大仔，出席佢畢業禮，終於等到呢日，我冇準備啲乜送俾佢，供書教學已經係最大禮物。今次留美國十日，同個仔玩吓，好耐都冇試過一齊。」
對於想唔想兒子成家立室，秋生話：「唔好提，費事嗌交，之前講呢個話題都嗌交。」秋生指大仔畢業後都唔會返港發展，佢話：「返嚟做咩？都習慣唔到。」
(蘋果日報)
