去年5月，王浩信仲忙緊拍台慶劇《溏心風暴3》，當時有報道話佢打算買樓氹老婆陳自瑤，目標瞄準豪宅地段淺水灣。當時王浩信回應話距離目標尚有距離，暫時先考慮細單位。
一年之後，王浩信已升為視帝，密密開工儲彈藥，仲好開心咁同大家講——代囡囡送禮物俾太太，呢份禮物就係：獨立屋！不過，SignalWong補充番，依家仲係努力緊，希望今年成事。佢仲話，距離目標越來越近，地段會揀喺將軍澳或西貢，物業會寫太太個名。但就補充一句「銀碼有限」咁啦。
今日最新消息：恭喜晒SignalWong！大個仔首次置業，以3306.6萬，購入清水灣傲瀧11座高層B單位，實用面積1,837呎，呎價1.8萬元。晚上王浩信接受傳媒訪問時話：「之前同媽咪去睇，佢覺得鍾意，最後就決定買！」
之前佢講過會買樓俾YoYo，唔通一次過買兩層樓？佢就話：「唔係，逐步逐步嚟，我同YoYo商量過，o依家先買俾媽咪，之後繼續努力做嘢搵錢，先再送俾老婆，佢都好贊成呢個決定。」
講番清水灣傲瀧，前日加推103伙，折實平均價約兩萬元，本周六賣91伙。新世界發言人表示，傲瀧今天暫錄逾20宗成交，連同車位銷售，單日套現逾5億元。
(蘋果日報)
