柏宇表示：「從來冇秘密，有咩都會拎出嚟講。」唯獨係太太有BB未夠三個月前，兄弟都好有義氣咁幫佢保守秘密，佢話：「我哋男人冇講過，但我老婆自己周圍同人講咗。」
陳柏宇同趙勁皓(King)有份投資嘅麻辣火鍋店，昨天晚上喺尖沙嘴舉行開幕剪綵儀式 ，柏宇太太符曉薇大住肚現身，支持老公，而趙勁皓太太盧頌之同囡囡都有到場，兩位老闆接受訪問時透露由於銅鑼灣店生意唔錯，所以打算擴充營業。
柏宇今次大約投資咗五百萬，預計今年底會喺荃灣再開第三間分店，柏宇直言自己對打理生意仲未學懂，但最重要就係搵到好嘅拍檔，而趙勁皓就話：「柏宇都係好拍檔，對我哋幾個生意拍檔好信任，大家從來冇拗撬，而且佢都融入咗我哋朋友圈。」柏宇表示大家係生意拍檔兼好朋友：「從來冇秘密，有咩都會拎出嚟講。」唯獨係太太有BB未夠三個月前，兄弟都好有義氣咁幫佢保守秘密，佢話：「我哋男人冇講過，但我老婆自己周圍同人講咗。」
陳柏宇今日喺新城繼續為新歌《無限大》做宣傳，佢指新歌出現一個美麗嘅誤會，大家都以為佢係寫畀囡囡，其實首歌係同一個人合作嘅計劃，不過呢個誤會，同時啟發咗佢下一張專輯構思，佢話：「監製好想我喺新碟裡面多啲參與揀歌，甚至作曲，而呢排講得最多就係囡囡，令我腦海有好多嘢諗到，新專輯題目應該同囡囡好大關係。」
身為準爸爸，柏宇已經諗定三個教導方針，講明唔做怪獸家長，首先係凡事出發點要好，其次唔好怕錯而失去嘗試勇氣，最後係犯錯要反思原因而知錯能改，佢話：「我冇睇育嬰書，係自己個腦去諗，好似有同太太傾過，不過佢就冇乜反應。我將來唔使囡囡飛黃騰達，但最緊要佢係一個識得幫助同關心別人嘅人。」
(蘋果日報)
