現年37歲嘅鍾欣潼（阿嬌）將於香港時間本周六喺洛杉磯跟台灣「醫界王陽明」賴弘國共諧連理，阿嬌婚前仍然孖Twins拍檔蔡卓妍（阿Sa）到美加做婚前最後巡迴演唱。工作完畢，阿嬌就準備婚禮，升呢幸福人妻。
阿嬌今年初生日時答應賴弘國求婚，兩人決定閃婚，並獲身邊人祝福，阿嬌曾講過最好由未婚夫備婚禮，果然賴弘國落力打點，阿嬌邀得阿Sa及鄭希怡（Yumiko）做姊妹，而Yumiko萌爆囡囡梁浸浸則做花女。
經理人霍汶希（Mani）日前低調飛美，見證「嫁女」阿嬌婚前呢兩日都會留喺店爭取時間休息，Mani今晚同咗阿Sa等友人食飯，Mani今日短訊回覆《蘋果》：「我們今晚難得聚首一堂，和阿Sa出外吃了韓國燒，和梁浸浸玩了一晚好開心，阿嬌留守酒店。」
同Twins剛完成巡唱嘅音樂人Terry，佢都喺社交網貼出三人合照，以及Twins舞台上靚相，待嫁新娘阿嬌穿上吊帶裙，全程笑容燦爛。阿嬌周六安排在洛杉磯一間逾百年嘅酒店舉行婚禮，邀請嘅賓客唔多，全部係阿嬌至親及好友，午便開始招呼賓客進場。
(蘋果日報)
