咁多年嚟都極少同老公一齊出席公開場合。3年前，有報道話佢同老公婚姻亮燈，但之後兩公婆被發現放狗行街，不知幾咁恩愛。
亞姐出身嘅朱慧珊對感情事一向極低調，好似佢95年同法律顧問葉順榮結婚，婚後10個月閃電離婚之後，喺08年同拍拖11年嘅隱形富豪商人賈鈞鵬喺關島註冊結婚，咁多年嚟朱慧珊都極少同老公一齊出席公開場合。3年前，有報道話佢同老公賈鈞鵬婚姻亮燈，但之後兩公婆被發現放狗行街，不知幾咁恩愛。
日前，《蘋果》讀者鄧先生發現朱慧珊同老公孖住去食早餐，兩公婆結婚咁多年依然甜蜜。鄧先生透過《蘋果》「爆相爆片」報料，話日前上午撞見朱慧珊同老公喺新蒲崗Mikiki商場間文華冰廳食早餐。鄧先生話：「我喺入面食緊嘢，見到朱慧珊個老公一個人喺度排隊，原來朱慧珊喺附近行，到有位嗰陣，佢老公坐低之後，朱慧珊就行入嚟坐。佢哋坐咗喺4人枱，不過朱慧珊坐低之後四圍望，應該係想睇吓有冇二人位，唔想同其他人一齊坐。」
鄧先生話之後朱慧珊同老公起身再排二人枱，而佢隱約聽到朱慧珊係講國語，大概同老公研究食乜，但因為兩個人講說話好細聲，側邊啲人好難聽到佢哋講乜。
(蘋果日報)
