93年結婚，老公在一間上市保險公司任職總經理，兩人育有一子一女，今年踏入銀婚25周年，她笑說：「人哋叫佢黃總，我叫佢黃腫；佢叫我honey，我同佢要money。」言笑之下，盡顯鶼鰈情深。
25年婚姻細水長流，兩夫婦跟升斗市民一樣，為了供子女到外國讀書，想盡辦法搵錢儲錢，張麗瑾成為了師奶股神：「我老公係完全冇錢，佢由messenger做到o依家manager，佢係一個好努力嘅人，我哋夠生活就算，唔會好忙碌爭取多啲錢。直至仔女要去外國讀書，計吓條數，嘩！唔掂喎！佢哋嘅品性好好，只不過學業上唔係好有進度，因為香港教育問題，可能我都有畀少少壓力，令到佢哋驚咗，惟有送佢哋去外國讀大學，於是要諗方法搵嚿錢，有乜可以好快呢？就係做投資。」
為了子女的前途，麗瑾認真學習投資：「成日去聽投資講座，包括投資喺股票、樓市，o依家有3層樓，車位有兩個。」麗瑾公開投資秘方：「唔使全部用晒自己銀包嘅錢，借囉，真㗎！我唔係呃你，借咗錢返嚟，千祈唔好要嚟買嘢，用錢搵錢，講穿即係買股票，可以將股票按畀銀行，佢就會借番一半嘅錢畀你，咁你多咗嚿錢活用，我試過用呢嚿錢買車位，嘩，個車位嘭嘭聲半年賺10萬。」
目前在元朗手持3層樓，麗瑾坦言：「因為我未賣，賺幾多唔可以作準，但起碼都有900萬，不過唔好忘記，900萬有一半係欠銀行。有時男人雖然好精明，但講到投資唔夠女人狠，可能男人要負責頭家好驚青，如果衰咗仔女都冇得食要瞓街，可能諗得好差，但我好狠好夠膽，成日覺得唔會衰到咁，當時我都同老公講，投資喺樓唔會輸。」
麗瑾分享投資心得：「有啲人好驚借錢，睇你點借，有時銀行會叫你借5、6萬，識投資每個月大概可以賺1,000蚊，譬如6個月還晒，就算利息收1,000，你都賺咗5,000，唔好睇少呢5,000，啲錢係一滴一滴積落嚟，但首先要儲錢，冇錢空談。」
(蘋果日報)
