現年52歲嘅曾華倩，近年多咗喺幕前出現，舊年更加盟亞視，並夥拍朱慧珊、朱慧敏及樂瞳主持節目《今晚見》，過往邀請過毛舜筠、韓君婷等做嘉賓，都有唔少捧場客。
不過，今日有周刊報道，指一向以精靈、反應快聞名嘅華倩，喺早前播出一集訪問李婉華嘅《今晚見》中，反應遲緩，更不時現疲態，面部肌肉更出現疑似失調同僵硬嘅狀態，有觀眾目擊到華倩面戚戚、表現失準，紛紛上網留言表示憂慮，擔心華倩健康出問題，有人直指華倩呢啲表現可能係中風先兆。
事後華倩回應周刊查詢時，指自己當日疑有感冒，又食咗啲頭痛及止痛藥，加上工作排得密麻麻，疑因休息唔夠同藥力散，所以先會出現失準情況。而佢亦否認自己面癱，安慰大家話唔使擔心。
其實華倩喺1996年嫁俾林肇基，誕下兒子林浩賢後，就專心相夫教子。離婚後，華倩全力湊仔，同時又要搵錢養家，且極緊張兒子學業，無論係個仔考試定課外活動，華倩能陪就陪。林浩賢亦好生性，係一名出色嘅游泳健將，不單試過打破學界紀錄，更係香港隊成員之一。囝囝開始長大，華倩可以逐步放手，近年先至喺幕前出現番多啲時間，不過，要同時兼顧家庭同事業，華倩幾乎用盡時間，可能因此唔夠休息，影響健康。
(蘋果日報)
