講到喺社交平台貼咗張同方力申嘅合照，惹嚟拍拖疑雲，而日前5.20，佢就話：「呢啲日子個個都喺度晒命，亦都希望自己。。。」
冼國林、陸詩韻、組合BOP、莊思敏等昨晚喺尖沙嘴出席天盟娛樂三周年晚宴，陸詩韻話同公司老闆係好朋友，陣間又要做《宮心計2深宮計》宣傳，所以自己會走兩場。
問到陸詩韻會唔會同呢間公司合作，佢話：「都可以傾吓，睇吓有乜新戲開，最近都好似興古裝，都想試吓。」佢又話啱啱喺廣州拍完一套網劇：「廣州好熱，自己因為好耐冇拍劇，挨夜覺得好辛苦，通咗兩晚頂就覺得好攰，唔知係咪因為當地天氣好焗，所以好攰。」不過佢話仲頂得順，覺得拍古裝幾得意幾好玩。問佢係咪愛上拍古裝？陸詩韻話：「可能我個樣啱古裝，襯到古裝，反而時裝好似冇咁受落冇咁好玩。」
而莊思敏講到喺社交平台貼咗張同方力申嘅合照，惹嚟拍拖疑雲，問佢係咪追到方力申？莊思敏話：「唔係呀，只係大家都係做義工，因為聽日就佛誕，最近慈山寺嗰度有好多慈善活動，噚日星期日有好多慈山寺嘅活動，去做義工，去到見到，唔係刻意嘅。」
咁會唔會有機會發展呢？莊思敏話：「我又冇諗喎，冇傾過呢件事，大家都冇討論過。（如果對方矮過你，你O唔OK？）都OK嘅，不過你哋（指記者）有冇問過人哋得唔得？其實大家冇傾任何嘢。」
講到5.20，莊思敏個妹莊思明喺社交平台晒幸福，佢話：「都慣咗啦，呢啲日子個個都喺度晒命，我都已經習慣，祝福所有人都有情人終成眷屬，亦都希望自己快啲搵到個男朋友。」
(蘋果日報)
