陳百祥（阿叻）、鍾舒漫（Sherman）、張寶欣、雷莊兒、陳庭欣、王灝兒（JW）等，昨日喺將軍澳出席公益金記者會，着住西裝褸內露黑Bra Top嘅Sherman性感現身，佢笑話因為天氣熱，所以入面所着得清涼啲。
林師傑上年底向歐陽巧瑩求婚成功，佢哋已經開始緊籌備婚禮，林師傑：「準備咗一部份，婚期同場地都定好晒，連去邊度度蜜月都計劃緊喇！」林師傑突然笑話：「戶口存款都越嚟越少，好彩女方屋企人冇要求禮金，好體諒我哋嘅經濟狀況。」
另外，譚詠麟日前將曾志偉同阿叻改圖變成女人嘅相放上網，阿叻笑話：「佢有咩做？改咗就證明我靚仔過佢，我係男子漢，佢係生女相，我唔介意佢做埋呢啲無嘢！」
網民覺得佢似女人裝嘅關之琳，阿叻話：「唔好拎關之琳嚟講笑，似熊黛林先啱，我早就扮過女人叫多隆，大家都記得我身材好好。」
(蘋果日報)
