林盛斌（Bob）除咗係演員、好司儀，仲係一個好爸爸，前日佢帶同3個女出席商場活動時，已經透露過細仔林道申（Jaye）本來都到，但因為___，所以被逼留喺屋企。
到咗噚晚，阿Bob喺Instagram貼相，「公開」Jaye病況，相中嘅佢臉面佈滿紅疹，連手仔都係，唔知係咪病，佢嘅神情較呆，Bob留言話：「本身好靚仔嘅細佬突然變到咁，做爸爸嘅真係心痛到一個點……希望老婆自家製嘅愛心cream 可以幫到你，寧願佢啲濕疹十倍咁生喺我度都唔想見到佢咁陰功。」
佢仲留言問網民有冇古法偏方可提供，等囝囝早日康復。有唔少網民都提供啲藥膏牌子同意見俾阿Bob，不過，亦都有網民話嚴重都咁，應該正經求醫而唔建議用偏方。點都好，未夠一歲嘅人仔搞到咁，點都心痛，更何況係爹哋阿Bob？正所謂「病在兒身，痛在父母心」，又曰「孻仔拉心肝」，希望Jaye早日康復，再次靚靚仔仔見大家。
(蘋果日報)
