今日喺深水埗出席下月公演嘅舞台劇《我是過來人之南北一家親》發佈會，出身於亞洲電視第一期訓練班嘅區靄玲，現時係無綫合約演員，最近仲有份參演《逆緣》，佢話：「公司畀我自由度好大，好鼓勵我哋多方面發展，雖然我6月要開劇，但已經向公司度期。」
至於久未露面、亞姐出身嘅王薇則表示首次演出舞台劇，面對一班演技派演員，佢坦言感到有壓力：「又要做戲、唱歌，舞台劇又唔可以NG，o依家練緊歌，但記歌詞好難，加上又有唔同嘅方言。」王薇透露喺劇中飾演來自上海嘅表妹，同傅晉杰一對，但亦會介入麥翠嫻同甄志強呢對夫妻之間。而甄志強就話：「今次係我從影以來一個新突破，因為我要扮奇哥。」麥翠嫻笑言要扮寶珠。
(蘋果日報)
