5月18號係發哥周潤發63歲牛一，今年發嫂悉心包場，喺尖沙嘴一間酒店為老公舉行生日會，請來發哥主演新片《無雙》監製黃斌、導演莊文強、仲有「行山之友」廖啟智、方中信，安樂電影公司老闆江志強，攝影師潘耀明等好友出席，最驚喜嘅，係《千王群英會》嘅屠一笑——四哥謝賢現身！
噚日發嫂特登提早個幾鐘去酒店打點，一定要提嘅係個生日蛋糕，有兩個公仔selfie——一個係發哥，一個係發嫂，兩個攬住坐喺公園長凳自拍，蛋糕上面寫住：「祝你生日快樂，身體健康，夢想成真，並祝《無雙》票房勢不可擋，席捲全球，創造最高紀錄」，之後再加兩個心心，下款係「發嫂」，好sweet！
席上，生日蛋糕「出場」一刻，全場打拍子合唱生日歌，發哥笑笑口企起身出去——但唔係準備切蛋糕，而係走去四哥身邊，拉咗四哥出去一齊切餅，四哥反問：「我生日咩？」發哥即刻話：「你生日呀！許個願啦！」之後四哥就做咗個劃十字架嘅祈禱動作，兩人仲嘴對嘴扮錫，全場人大笑。
之後兩人又扭腰比舞，81歲嘅四哥一身牛仔look打扮，由席上跳到出露台——原來發哥係教緊佢原地慢跑，果真老而彌堅。
另一驚喜，係智叔廖啟智，現場live band獻唱完生日歌之後，緊接唱出葉麗儀嘅《上海灘》主題曲，智叔聽到音樂，即時衝出去搶咪，用林子祥腔唱埋一份，發哥就一邊同佢合唱一邊selfie。
發哥事後話老婆今次呢個驚喜安排相當成功：「以為只係幾個朋友食飯，完全唔知有老闆、監製、演員同四哥，好開心！生日願望係可以繼續跑山見神仙，喺山過美好生活，好開心㗎！」
(蘋果日報)
