如果你係八十後，recall番啲童年回憶返嚟先……細個睇無綫劇，會唔會覺得奸仔吳啟華個樣變化好大？有冇懷疑過係兩個唔同嘅人？
冇錯，真係兩個人。《流氓大亨》嗰個PK係吳啟華，《大時代》俾人掟落街嗰個丁旺蟹係吳啟明。吳啟明係吳啟華親生大佬。兩兄弟從來不曾於無綫合作，因為吳啟明係喺吳啟華離開大台之後，先至考TVB藝訓班。兩兄弟明明戴上金絲眼鏡活脫脫就係一個斯文人，但無綫總係安排佢哋兩兄弟演敗類。吳啟明87年加入無綫，都拍過唔少劇，包括《鐳射青春》、《鬥氣一族》、《奇幻人間世》、《邊城浪子》、《絕代雙驕》、《義不容情》、《大時代》同《恨鎖金瓶》（單立文飾演西門慶！） 95年吳啟明拍完電影《狼吻夜驚魂》後，就離開娛樂圈，吳啟華亦回歸大台，例如拍《壹號皇庭V》、《900重案追兇》、《妙手仁心》等等，都算係另類「無縫交接」。
星途不算順利嘅吳啟明，呢廿幾年嚟都陸續有啲花邊新聞傳出，有次甚至上埋港聞——有傳吳啟明轉行做投資顧問，甚至傳佢曾炒燶股票欠債過千萬，之後由人生低谷之後又上番去高峰。三年前大台重播《大時代》，四隻蟹仔陶大宇、邵仲衡、郭政鴻聚舊三缺一，獨欠吳啟明，當時大宇都話同啟明20年冇見。
消失咗23年嘅吳啟明，日前現身中環被《蘋果》獨家捕獲，現年54歲嘅吳啟明樣子滄桑咗、身型比後生時發脹咗少少，官仔骨骨嘅形象冇晒，變得成熟穩重。當晚大約7點幾，吳啟明單拖現身中環九如坊，一個人喺公園食雪茄，之後入番餐廳同朋友食飯，紅酒白酒連環飲，食完飯後約一粒鐘後，吳啟明又出門外食雪茄。其後記者上前採訪，初時吳啟明唔太願意做訪問，其後亦大方傾幾句。
問及近況，吳啟明話：「我咪搞間細細間餐廳玩下啫嘛。」有冇諗住再拍番戲？問到之前《大時代》蟹仔飯局冇出嚟，吳啟明坦言：「基本上離開咗呢行，我唔想再高調出番嚟。」冇諗住再拍番戲？佢搖頭：「做啲小生意得啦。」
問到開咗幾多間餐廳？吳啟明表示：「一間喺河南，一間喺湖南，第三間喺北京，係旗艦店好大間，跟住仲會喺上海。」香港暫時就得中環呢間總店，吳啟明坦言：「因為我係借香港嘅牌子去大陸，俾人知道我哋香港嘅製作係非常之嚴謹，並唔會用嗰啲地溝油呀、唔知乜嘢嚟，所以我係借中環總店開上大陸，係香港中環有先，跟住將呢個名帶上大陸。」
諗住開幾多間分店？吳啟明話：「呢個係希望，未必做到，我諗住開十間，喺大陸開完之後，可能喺九龍開一間，我對食好有要求，我嘅理念係將好食嘅嘢畀所有人食到，咁香港嘅人食到，我都想九龍嘅人食到，我想share好食嘅嘢畀大家。」
(蘋果日報)
